Shabab BiK | شباب بيك | افلام كرتون | افلام تورنت | العاب | برامج | اسلاميات


    اسـرار عن الشـباب هامه للغايه

    شاطر
    avatar
    prince
    الــريــــس الــكــبــيــر
    الــريــــس الــكــبــيــر

    ذكر
    رقــــم العضويـــــــــة : 1
    مجموع المشاركــات : 1809
    المزاج : يعني حاجه تمام كده
    تاريـخ التسجيـل : 04/08/2007

    ??????? اسـرار عن الشـباب هامه للغايه

    مُساهمة من طرف prince في الأربعاء يناير 28, 2009 1:13 am



    1_ الشاب بيبص على البنت الحلوة (لان الله جميل يحب الجمال) بس مش شرط يحب
    وحدة قمر 14 المهم تكون حسنة الطلعة زي ما بيقولو و روحها حلوة و جذابة .


    2- الشاب ميحبش البنت تعاكسه و تترمي عليه و تتغزل فيه و في جماله عشان ده دوره هو المفروض .

    3- ممكن الشاب يعجب بيكي للحظة و ينساكي بعديها ولا كأنه شافك قبل كده .

    4- لما الشاب يقولك انا مش قادر افهمك هو يقصد ببساطة انه أنتي مبتفكريش بطريقته أو زيه .

    5- "بتعملي إيه ؟" أو "كلتي ولا لسة ؟" دي أول أسئلة يسألها الشاب لما يكلمك على التليفون بدل ما يقعد ساكت أو يقعد يتأتأ .


    6- صحيح ممكن الشاب تكون عينه زايغة على البنات اللي رايحة و اللي جاية بس
    صدقيني قبل ما يجي ينام بيفكر في البنت اللي بيحبها و يحب يبقى آخر صوت
    سمعته ودانه قبل ما ينام صوتها .


    7- لما الشاب يحبك بيتجاهل كل عيوب شخصيتك (مبيقعدش يطلع فيكي القطط الفطسة ويوريكي انك ازبل خلق الله) .

    8- ابتسامة فرح جميلة منك بالدنيا واللي فيها عند الشاب .

    9- الشاب ممكن يعمل أي حاجة ممكن تتصوريها أو حتى متتصوريهاش عشان يلفت انتباهك .

    10- الشاب بيتضايق جدا لما بتتكلمي عن الشباب عموماً و بالذات عن حبيبك الأولاني و تجاربك اللي فاتت .

    11- لما الشاب يقولك انه عايز يقابل اهلك اوعي ترفضي بل بالعكس شجعيه و اقفي جمبه في المعركة عشان تحسي بحلاوة النصر .


    12- الشاب بيبقى نفسه يقول ويقول عن نفسه .......... بس مبيعرفش يقول غير
    عن مغامراته اللي تتصدق بالعافية أو عن شجاعته في خناقة في فلم أكشن


    13- على فكرة الشاب بيعيط (مهما بان جامد و قوي مهو بني آدم برضو) .

    14- لما تبقي في بداية علاقة متستعجليش على انك تضايقي الشاب عشان تتخانقوا ..........صدقيني هتتخانقوا هتتخانقوا .

    15- الشاب ميعرفش يحلم و يتأمل كتير زيك و معندوش صبر عايز كل اللي يتمناه يتحقق في ثانية .

    16- الشاب يموت عشان يوصل للبنت اللي نفضتلوا و ده بيخليه يتقبل هزيمته و خسارته بصعوبة جدا عشان دايما المفروض هوا اللي يكسب .

    17- لما توصلي لقلب شاب أنتي كده دخلتي سكة مفيهاش راجعة (دخول الحمام مش زي خروجه) .


    18- اوعي تدي شاب رسالة متعلقة زي " عارف... " أو " عايزة أقولك حاجة.. "
    و تسبيه كده عشان كدة دماغه هتنط لاستنتاج بعيد أووووي عن اللي في دماغك .


    19- الشاب بيتجنن لما بيلمس ايدك .


    20- الشاب لما يكون بيلعب لسانه ده بينقط كلام زي العسل يدوخ بيه اجدع بنت
    بس تعالي حطيه قدام واحدة بيحبها هيتأتأ و كأن القطة اكلت لسانه



    21- لما الشاب يقولك " اااممممم " أو يديكي أي عذر لما تطلبي منه حاجة
    اعرفي انك مش عجباه ومش مستعد يديكي (الكريديت كارد) أو حتى يدفع فيكي قرش
    واحد .


    22-قولي للشاب أنتي عايزة إيه منه بالظبط من الاول قبل ما تقع الفاس في الراس و بعدين يقول ياريت اللي جرى ما كان .

    23- لما تقولي لشاب " لأاااه " بيسمعها هو حاول تاني بكره (معلش أطرش ههههههههه) .

    24- الشاب بيكره الشاب الفافي .

    25- الشاب بيموت في أمه (يعني كلوا الا هيا) .

    26- الشاب ممكن يضحي بالفلوس اللي هيتغدي بيها عشان يشتريلك بوكيه ورد احمر (يعني يجوع عشان سواد عيون حضرتك) .

    27- متستبعديش ان الشاب ممكن يفكر في بنت معجبة بيه بس ده مش معناه ان حضرته مغرم بيها .

    28- مستحيل تفهمي الشاب إلا لو سمعتيه كويس (فبلاش بقي تنزلي لوك لوك لوك لوك و اديه فرصة ينطق) .

    29- الشاب لو قالك بحبك مرة واحدة في القرن اعرفي انو فعلا بيحبك (بس مفيش مانع حضرته يسمعك شوية كلام حلو عشان يحسسك بأنوثتك) .

    30-
    حاسبي ........ الشاب احسن واحد ينشر الإشاعات يعني في خلال ساعة واحدة
    شباب مصر كلها هيعرفوا اللي عايز يقوله من غير ما يعرفوا صدق والا كذب .


    31- زي ما حصل مع اومنا حوا و ابونا آدم أنتي نقطة ضعف الشاب (استغلي المعلومة دي كويس ههههههه ).

    32- صح انك تجربي الشاب الأول قبل ما تصدقي كلامه بس متسيبيهوش مستني كتير برة دائرة ثقتك .

    33- الشاب غالبا بيبقى صريح قوي لما يجي يتكلم عن نفسه .

    34- مفيش شاب ميعرفش يعاكس و يقول كلام حلو كلهم معاهم دكتوراه منذ الولادة بس بتختلف من واحد بجح لواحد بيتكسف من خياله.


    35- الشاب الشيك النضيف يموت لو هدومه اتوسخت حتى لو كانت الحتة اللي
    اتوسخت اد السمسماية ولو حلفتيلو 100 يمين انها مش باينة مش هيصدق (خوديها
    من قاصرها وقوليله يروح يغير) .


    36- الشاب بيحب البنت المحترمة حتى لو مكانتش أمورة للدرجة .


    37- انتيمتك (صديقتك العزيزة يعني) اللي الشاب بيلجألها لو حب يعملك
    مفاجأة مثلا أو في مشكلة بينكوا وعايز حد يتوسطله مش بعيد ابدا يحبوا بعض
    هما الأتنين و تخسري الأتنين حبيبك و انتيمتك (وكدة 1000 مبروك خرجتي أنتي
    من المولد بلا حمص ايد ورا و ايد قدام ) .


    38-
    الشاب لو شكالك همه و حكالك عن مشاكله هو مش عايز منك غير انك تسمعيه
    واوعي تعملي فيها ام العريف و تنصحيه في نفس ذات اللحظة (في حموتها ) انما
    بعديها ممكن .


    39- حركة لا إرادية الشاب بيعملها فيكي لما تكوني أنتي حبيبته يفضل يضايقك و ينرفزك و يغيظك و يعلق على كل كلمة تطلع من بقكك .

    40- الشاب لو حبك و كنتي مرطبتة هيلاقي 1000 مليون طريقة يبعدكوا فيها عن بعض و يخليكي تحبيه ( فخلي بالك ) .

    41- الشاب بيحب البنت اللي عندها حاجة اسمها عقل مش البنت اللي بتلبس ( مينيي سكرت ) .

    42- الشاب بيحاول يجيب الهدية اللي ممكن تعجبك صحيح بتمثلي انها عجباكي بس بينا و بين بعض نادراً لما بتعجبك صح ؟؟؟ ههههههه .

    43- عملياً الشاب بيتفاخر عن كل حاجة تخصه ( ده أساسي يعني هههههههه ) .


    44- الشاب (غالبا ً( عمروا ميتأمن على سر خدي بالك بقوا مبيتبلش فيه فولة
    وده غصب عنوا ديه طبيعة عادي يعني .مش كلهم يعنى وفى بنات كده برضو انتم
    مش ملايكه يعنى دى صفه مشتركه بين الشباب والبنات.


    45- الشاب دماغه مبتهداش على طول بتودي و تجيب مبيبطلش تفكير ابدا .

    46- الشاب خياله واسع قوي (يرمح فيه الخيل يعني . . . ههههههه) .

    47- الشاب طولك عندو مش مهم بس صدقيني مفيش عندو أهم من وزنك حااااسبي .

    48- الشاب دايما لما يدخل علاقة جدية بيكون متملك لأبعد الحدود ( يعني هيقرفك قوي بس لو بتحبيه استحملي دي طبيعة آدم لما يحب) .

    49- لما سيادتك تجنني شاب معجب بيعاكسك و تديلوا الطرشة ( تنفضيلوا يعني ) هيتمسك اكتر بيكي و هيلزء ههههههه .

    50- غالباً بيكون صعب على الشاب يسيبك و خصوصاً اذا كان بقالكو مع بعض أكتر من 3 سنين ( يعني لو عمل كدة هيكون بيدوس على قلبه ) .

    51- لازم لازم لازم الصراحة يعني تقولي للشاب أنتي بجد مستنية إيه من علاقتكوا ببعض قبل ما تدخولوا في الجد و تقع الفاس في الراس .


    52- تحذير هاااام الشاب لازم يجرب الإحساس بالرفض وخصوصاً لو كان من
    الشوية الأمامير اللي مفيش بنت قدرت تقاوم جمال عيونه (ههههه قال يعني )
    وإلا عمرو مهيكبر و يعقل ويبطل لعب العيال



    53- لو حصلت ظروف مش قد كدة غالباً الشاب بيلوم نفسوا أكتر بكتير منك يا
    بنوته ده كمان ممكن توصل انو يعمل حاجة في نفسو اوعي تسيبيه في ظروف زي دي
    اتفقنا ؟ عشان ده أكبر وقت بيحتاجك فيه .


    54- الشاب عموماً عندوا انفعال و شغف انو يتغير للأحسن * بس إرادته للأسف ضعيفة يعني محتاج منك زأة لو مفيش مانع .


    55- الشاب يكون مع الناس كلها واد إيه أسد مرعب محدش يقدر يفتح بقوه معاه
    بس يجي معاكي أنتي و يبقى زي القطة المتروضة مش خوف منك لا سمح الله لأ ده
    من حبه ليكي ( إوعي تفهميه غلط ).



    56- لو الشاب في موقف المفروض يكون متنرفز فيه و هوعملك عم الكوول اللي
    أعصابه باردة و ميتعصبش بسرعة شوفي اذا كان عرقان هتعرفي أد إيه هوا
    متنرفز .


    57- لما الشاب يقولك انو مجنون بيكي يبقى فعلا حبك عملو جنان ممم غالباً مش بيكدب .

    58-
    لما الشاب يقولك سبييني في حالي إعرفي إنو بيقولك "بلييز تعالي و إسمعيني"
    يعني زني عليه عشان يحس انك مهتمة بيه و ان اللي يدايقو يدايقك (بس مش
    الزن اللي يخنق) .


    59-الشاب في الحقيقة غالباً ملوش قرار نهائي ( وخدي بالك من النقطة دي) .

    60- لما الشاب يحبك بيطلع كل الحلو اللي فيه (إكسكلوسف ليكي أنتي و بس) شفتي بقي حبك بيعمل فيه حاجات حلوة إزاي .

    61- لما الشاب يسيب التهريج و يبقى عايز يتكلم بجد إسمعيه و وريه اد إيه أنتي مهتمة .


    62- لو الشاب فضل ساكت و قافل بقوه متقلديهوش و تأعديلي ساكتة أنتي كمان
    انطقي و حاولي بكلمتين كدة تظبطي القاعدة و تدوبي التلج اللي انتو فيه .



    63- الشاب ما بيأمنش بالحب من أول نظرة على عكس معظم البنات وبرغم كده
    بيعاكس برضه لحد ميقع من غير ما حد يسمي عليه و ساعتها بس هيأمن و يبصم
    بالعشرة ان في حب كدة .


    64- الشاب بيحب في البنت أنوثتها بس ميحبش ضعفها يعني انوثة و قوة مع بعض و حلي بقى أنتي المعادلة الصعبة دي .


    65-الشاب ممكن يضيع وقته في ماتش كورة أو في لعبة بلاي ستاشن أو كمبيوتر
    (في الوقت اللي أنتي مشغولة بافكارك الرومانسية اللي بتشوفيها في الافلام
    الابيض و اسود) اوعي تتضايقي بالعكس خدي الموضوع ببساطة و لو مفيهاشرخامة
    حاولي تشجعي معاه أو حتى تلعبي معاه






    avatar
    menna_love

    انثى
    رقــــم العضويـــــــــة : 1210
    مجموع المشاركــات : 5
    المزاج : زعلانة
    تاريـخ التسجيـل : 23/07/2009

    ??????? رد: اسـرار عن الشـباب هامه للغايه

    مُساهمة من طرف menna_love في الخميس يوليو 23, 2009 7:21 am

    اية يا ستى الكلام الجامد دة
    ميرسى توبيك جامد موتتتتتتتت
    avatar
    SyCaMoRe
    VIP
    VIP

    انثى
    رقــــم العضويـــــــــة : 64
    مجموع المشاركــات : 226
    تاريـخ التسجيـل : 27/07/2008

    ??????? رد: اسـرار عن الشـباب هامه للغايه

    مُساهمة من طرف SyCaMoRe في الجمعة يوليو 24, 2009 12:44 pm

    لما الشاب يقولك سبييني في حالي إعرفي إنو بيقولك "بلييز تعالي و إسمعيني"
    يعني زني عليه عشان يحس انك مهتمة بيه و ان اللي يدايقو يدايقك (بس مش
    الزن اللي يخنق) .


    hhhhhhhhhh ah w el bnat fe mnhm msh bytwaso hyzno l7d ma el a5 ytrsh
    thnxxx ya prince

      الوقت/التاريخ الآن هو الجمعة ديسمبر 15, 2017 1:33 am